Аляксандар Нінько[1]
Спаважна дрэмлюць хвоі векавыя, І спіць ільдом скаваная Няшчарда, І зоры ў небе міргаюць тужліва, І знічкі, шэрых прыцемкаў нашчадкі, Канаюць у бясконцасці панаднай. І ціша спее навакол. Ды раптам Шалёная завея збудзіць наваколле, І злы паўночны вецер вырвецца на волю. І нехта дзіка стогне і скрыгоча – Мароз па скуры, рознае здаецца – Нячысцікі там стогнуць і рагочуць, І страх міжволі працінае сэрца. І ў роспач прыйдзе позні падарожны, Дарогу згубіць, зблытае напрамак. Чакацьме ён выратавання Божага, Калі нарэшце прыйдзе зімні ранак. Ды раптам блісне нешта ў гэтай скрусе, У снегу ліхаманкавым хаўрусе. Зіхціць то светам ратавальным Агеньчык свечкі на вакне. Маёнтак там Завальні. Трашчаць у грубцы заліхвацка дровы, І госць сагрэты, крыху асмялеўшы, Падыме чарку: – Гаспадар! Бывай здаровы! Цяпер ты сябра мой напершы. А потым – простыя,
крыху хмяльныя сказы, Што мы ўжо гінем, бо збяднелі духам. Не помнім продкаў мудрыя наказы І чужаземных цмокаў слухаем. Што мы – нашчадкі злое той віхуры, Што на кавалкі нам краіну разарвала. Сарокі Белай служкі-трубадуры Крычаць усім, што нас ужо не стала. Што Плачка дзесь самотная блукае З вачыма, набрынялымі слязьмі. Сыноў сваіх аплаквае-гукае, Што ў лютых сечах паляглі касцьмі. Што стала цесна волатам ў магілах, Што, пэўна, час ім выйсці ўжо на волю І паляцець зноў на Пагоні крылах Па беламу заснежанаму полю. І кожны, хто пачуе тыя словы, Той знойдзе Пачаноўскую крыніцу, Ачысціцца ад вечнага праклёну, Каб зноў самім сабою нарадзіцца. …Напэўна, усе мы збіліся са шляху І страцілі надзею на вяртанне. І мы шукаем страчанага раю… А свечка дагарае. [1] Аляксандар Нінько ў 1998–2001 гг. вучыўся на філалагічным факультэце БДУ, працаваў у спецсемінары Л. Тарасюк і І. Запрудскага. |